Мугьяммад Пайгъамбари ﷺ чан рякъ хъапIрайидариз улупури гъахьи саспи къанунарикан сакьюдарихъди учву таниш апIурача.
Мугьяммад Пайгъамбари ﷺ чан рякъ хъапIрайидариз улупури гъахьи саспи къанунарикан сакьюдарихъди учву таниш апIурача.
Магьа дурар:
– яв хъял аьгь апIин, хъасин яв диндин гъардшиз багъишламиш апIин. Яраб увузра жарадари багъишламиш дапIну (хил алдабгъну) ккундаривуз?
– Сар-сарихьна даккнивал улупрударикан махьанай, сари гьатмунуриина бахилвал мапIанай ва гъайри касдиз хъял макапIанай.
– Сари тмунурилан улхури ва жини улхбарихъ хъпехъури вердиш махьанай, жарадарин ихтибарвализ кучIлар мапIанай;
– Жвуван дустракан гьадугъан кьяляхъ муулханай;
– Учвухъ гъилиху касдиз рубкьру гьякъи, дугъан кьяллан амкI ебццайиз улихьна, тувай;
Ибрагьим пайгъамбарин насигьятар
Ибрагьим пайгъамбар гьадмукьан аьхю ва адлу кас вуди гъахьнуки, гьеле гьамцира пуз шулу; дугъан ужувлан ляхнар ва хайирлу теклифар кьабул дарапIу миллетар гьичра гъахьундаршул.
Дугъан сакьюдар теклифарихъди - насигьятарихъди таниш йихьай:
– пиян апIру жюрейин штар мухъанай, аьшкьламиш апIру тамшйир мапIанай – дурар Жегьеннемдин гъапйирихьна вуйи рякъ ву;
– тIафалвал мапIанай;
– Игьтияж'вал айи ксарихьна буржди туву пуликан жвуваз хайир макадабгъанай;
– дюз дару гьяракатариъ иштирак махьанай ва ичв тахсиркарвал ашкар дубхьну, учвуз нач шлу ляхнар мапIанай;
– дустарин зяйиф терефар жарадариз ашкар мапIанай. Дурари деету гъалатIар ккеркай, эгер учвуз Аллагьу Тааьлайи ичвдар ккеркну ккундуш;
– къанундиинди учвуз лайикь дару ужувлар гъадагъуб метлебниинди руш'ватар мутуванай;
– гьяйванатариз инсафсузвал мапIанай;
– швумал гъахьирин юкIв архаин апIинай, гашлу касдиз уьл тувай, язухъвалиъ айирин гьяйифар зигай ва зарарнаъ ахънайи касдиз дубхьнайи гиранвал арайиан адабгъай.
– инсанар гьаму дюн'яйин ляхнар кIули гъахбиин машгъул духьнади учвуз гъяркъган, учву Аьхиратдин йигъаз вуйи ляхнар гъахбиин машгъул йихьай;
– дурар чпин чIат терефар балгбиин машгъул духьнайиган, учву ичв юкIвар балгай;
– дурар чпин бахчйириз ва хулариз - чIвурдариз хъайивал апIбиин машгъул духьнайиган, учву накьвариз хъайивал апIинай ва жвуваз гьадрар гьязур апIинай.
– инсанар жарадарин гъалатIар агбиин машгъул духьнайиган, учву ичв хусуси гъалатIар агай.
