1) Тирмизиди, Насаиди, Абу Давуда Абу Гьурайрадила (Аллагь рази хьуй ) Пайгъамбардин (Аллагьдин салатни салам хьуй адал) гьадис агакьарна:
«Шариатди кьабулдай себеб авачиз Рамазандин вацракай са югъ сив хуьн тавуна тур инсандивай ам вичин амай уьмуьрда сивер хвейитIани, эвез ийиз жедач».
И гьадисдин мана ам я хьи, амай уьмуьрда сивер хуьн хъувуртIани, Рамазандин са йикъан суваб адаз хъжедач. Им чна ахъа хьайи сивер хуьн хъувуна кIандач лагьай чIал туш.
2) Ибн Гьузаймади, Ибн Гьиббана Абу Умаматан (Аллагь рази хьуй) сагьигьда Пайгъамбардин (Аллагьдин салатни салам хьуй адал) гьадис агакьарна:
«Йифиз зун кьве касди ахварай авудна ва тик дагъдин патав тухвана. - Хкаж хьухь, - лагьана абуру. - Завай жедач, - жаваб гана за. - Чна ваз куьмекда ва рехъ регьятарда, - лагьана абуру. Зун хкаж жез башламишна. Дагъдин юкьвал агакьайла, заз эйбежер гьарайрин ван атана.
- Ибур нин гьараюнар я? – хабар кьуна за юлдашривай.
- Абур жегьеннем эгьлийрин гьараюнар ва шехьунар я, - жаваб гана абуру.
Абуру зун мад тухвана ва заз къадамрихъай куьрсарнавай, къазуннавай сиверай иви авахьзавай инсанар акуна.
- Ибур вужар я? – хабар кьуна за.
- Абур шариатди кьабулдай себеб авачиз сивер хуьн тийизвай инсанар я, - жаваб гана абуру».
Ибн Аббасалай (Аллагь рази хьуй) Ибн Гьузаймадин цIиргъинай агакьнавай гьадисдай аквазвайвал, Исламдин дестекрикай сад тамамар тийизвай касдин ибадатдихъ метлеб амукьзавач, адан я ферз, я сувабдин ибадат кьабулдач.
