ЧIявуну ттула динналул ссурваращал ихтиялат буллалиний ттун хIисав шай гайннал паракьатну цала ласнахь чIивисса бикIу, хъунмасса бикIу щялмахъ бусан бюхъайшиву. Цалагу му тIул къулагъасрагу дуван къааьркинмунин ккалли дувай.
Миннан захIмат бакъар ци-бунугу букъавсун кьабитан, бачIи-кьачину бусан ягу щялмахъ хIала бакьин. Му куццуй, щялмахъ бусаву кIура даллай дур щарссанил хасиятрайн.
Щялмахъ бусаву – хъинну мурдалсса ишри, цуксса чIивисса бунугу. Мунил ппив-ххив буван бюхъайссар халкьуннал дянивсса яла цIакьми арарду. Щялмахърал бат дувайссар вихшала ва хIурмат. Щялмахъ чIивисса ягу хъунмасса къабикIайссар – чIивимургу хъунмассар. Мунияту чан-кьансса щялмахъ бусаврингума ххуллу булун къабучIиссар.
МухIамммад Идавсил e хIадисраву бувсун бур дакIниву цIакьсса иман думанал щялмахъ бусан къабюхъайшиву. Мунияту, щялмахъ бусаву хъанай дур иман хьхьарашиврул лишан.
ХIакьину чIирисса тIул дакъашиву дувайманал гьунтти хъуннамургу дантIиссар. ЧIивисса щялмахъ бусайсса инсан аьдат хьуну, дазурду духларгун, гьарца шаттирал бакIрах аьркиннугу къааьркиннугу хъунисса, заралсса щялмахъру буслай айишинтIиссар.
Лас – Аллагьнал I хьхьичI щарсанил увкусса мукъурттихлу ва дуллалисса тIуллахлу жаваб дулунтIимари. Мунияту, мунахь дуссар ихтияр щарссанил чулуха щялмахъру къабаян.
Ва масалалух жува хъинну унгу-унгуну буруган аьркинссару, ласнал чулухунмай багьайсса хIурмат баву жула буржри. Щялмахъ бусавугу – бикIайкунсса хIурмат бакъашиву хъанай дур – вила чулухунмай ва ласнал чулухунмай.
Шиккува учин, Исламраву буссар щялмахъ бусан бучIисса, ягу бусан аьркинсса кIанттурду. Амма оьрмулуву, гьарца кьинисса багьу-бизулуву мукунсса кIанттурду азаруннива цагума къабикIай.
Зула дянив вихшала гьарза дувара, мюршсса иширттавугума щялусса махъру лях гьан мабитари – вихшалалул, тIайлашиврул зу мудан буруччинтIиссару.
Ва макьалалуву тIимур хъаннин багьайсса бунугу, хъама битан къабучIиссар арамтурахьгу дакъашиву цала хъаннихь щялмахъру буслансса ихтияр. Кулпатраву кIивагу чулуха так тIайлашиву дикIан аьркинссар.
Куннаха куннал хIурмат буллали, учайсса махъ так тIайласса учара – зул кулпатирттаву талихI ххи хьунтIиссар!
Рая Акавова
