Гьуьрметлу мусурман стхаяр ва вахар. Эвеленмиш хьун - им Пайгъамбардин (салам ва салават хьуй адал) рехъ я. Хизан арадал гъун, яни паб гъун ва я гъуьлуьз фин жуван уьмуьрдин, диндин саламатвал я. Амма и Сунна, хизан виридавай эхирдалди хуьз жезвач. Вучиз акI жезва? И кардиз вуч себеб ава? Диндин къанунар чир тахьун я! Ша чна и кадиз фикир гун, хизанар чкIунин себебар гьибур ятIа чирин.
Савбана (Аллах рази хьуй адал) Пайгъамбардин (салам ва салават хьуй адал) гьадис ахъайна: «Гьи папа вичин итимдивай тIалакь гун (чара хьун) тIалабайтIа, шариатди кьабулзавай са уьзуьрни авачиз, гьадаз женнетдин атир гьарам жеда».
Яни им еке гунагь я. Алай аямда чаз бязи хизанар чикIизвай къайда аквазва. Бязи дишегьлийри чпин итимриз икI лугьузва: «Вун итим ятIа зун рахкура, заз тIалакь це!» Гъуьлуьни вичин итимвал тестикьарун патал, кьили фикир тавуна, тIалакь гузва. Гьакъикъатда и кардалди итимвал тестикь жезвай туш, я стхаяр! Ахпа геж жезва, хизан чкIизва. Гуьгъуьнлай, хъел алатайла, гъуьлни паб пашман жезва, гьайифар чIугвазва. Ахпа гъуьл имамдин кьилив физва, са рехъ жагъуриз алахъзава. Гила за вучда, заз чара жез кIанзавачир лугьуз жезва. Гьуьрметлу мусурман вах, шариатди кьабулзавай са себебни авачиз жуван гъуьлуьвай тIалакь тIалабун гунагь я.
Папан вилик гъуьлуьн буржияр:
1. Гъуьлуь паб недай суьрсетдалди, парталралди ва яшамиш жедай кIвалелди таъминарун лазим я. Папаз вичин гъуьлуьвай адалай алакь тийидай багьа шейэр истемишдай ихтияр авач. И кар себеб хьана гъуьл гьарамдалди къазанмишун мажбур хьун мумкин я. Гьарам акатай хизан бахтлу жедач, гьарам тIуьна акьалтай веледар диде-бубадиз вафасузбур жеда. Аллагьди ганвай няметар кьадардилай гзаф ишлемишунни (исраф) кутугнавач. Папа кьенят авуна кIанда.
2. Месин буржи.
3. Папан ягь, намус, дин хуьн. Гъуьлуь неинки вичин папан, гьакI веледрин патахъайни Аллагьдин вилик жаваб- дарвал кьиле тухузва. Гьадисда лагьанва: «Итим вичин хизандин патахъай жавабдар я, паб – кIвалин». Аллагь-Таалади Къуръанда лагьанва (мана): «Эй иман гъанвайбур, куьне куьн ва куь хизанар жегьеннемдин цIукай хуьх». И аятдай чаз аквазвайвал, Халикьди хизан гьарамнавай кIвалахрикай хуьн гъуьлуьн хиве тунва. Им папа жаваб гузвач лагьай чIал туш, адани гуда, амма гъуьл – иеси я.
4. Папаз диндин чирвал гун, ам дишегьлийриз герек тир месэлайрин гъавурда тун.
5. Папахъ галаз хъсан рафтарвилер хуьн. Пайгъамбарди (салам ва салават хьуй адал) лагьанва: «Квекай вирадалайни хъсанди, вичин папахъ галаз хъсанди я. Зун квекай виридалайни жуван папарихъ галаз хъсанди я».
Кат1 ама...
