Михьивилиз Исламда еке къимет ганва

7 Октябрь 2017

Идалайни гъейри, ам ийидайла беден, парталар ва капI ийизвай чка чиркерикай михьи хьун шартI я. Михьивал гвачиз Къуръандик гъил хкуьрдай, Кябедилай элкъведай (тIаваф) ихтияр авач. Исламди чавай неинки винел патан михьивал, гьакI руьгьдин михьивални хуьн истемишзава. Михьивал хуьникай шариатдин ктабра лап гегьеншдиз кхьенва.

Жуван кIвале михьивал хуьз вири алахъзава, амма куьчедани михьивал хуьн лазим тирди чи рикIелай физва. Пайгъамбардин (Аллагьдин салатни салам хьуй адал), гьадисда лагьанва: «Рекьелай къван, тарцин хел, кIараб (яни инсанриз манийвал ийизвай шей) вахчурдаз садакьа паяй хьтин суваб жеда» (Тирмизи).

Маса гьадисда лугьузвайвал, са касди рекьяй физвайбуруз манийвал ийизвай тар атIанай, гьа кар себеб хьана адаз Женнет кьисметна.

Абу Гьурайради (Аллагь рази хьуй адал) ахъайна хьи, Пайгъамбарди (Аллагьдин салатни салам хьуй адал), лагьана: «Чи арада са кас авай, ам куьчейра къекъвезвай ва инсанриз манийвалзавай шейэр вахчузвай. Аллагьдини адан гунагьрилай гъил къачуна» (Тирмизи).

Абу Дардади Пайгъамбардин (Аллагьдин салатни салам хьуй адал), гьадис ахъайна: «Мусурманриз манийвал ийизвай затI рекьелай вахчур касдиз Аллагь-Таалади суваб кхьизва. Низ суваб кхьенатIа, ам Женнетдиз гьахьда» (Агьмад). Виридалайни хъсан Пайгъамбардин (Аллагьдин салатни салам хьуй адал), и гафариз яб гузвай кас михьивал хуьз алахъда. Гьина хьайитIани зирзибилар гадарун чаз кутугнавач, эгер са ни ятIани гадарайтIани, мусурманди ам вахчуртIа хъсан жеда.